Një ngjarje tragjike dhe ende e paqartë ka tronditur jugun e Italisë, ku katër persona janë gjetur të pajetë dhe të karbonizuar brenda një automjeti në një pikë karburanti përgjatë bregdetit të Jonit, në provincën e Kozencës.
Sipas të dhënave paraprake, viktimat dyshohet se janë shtetas me origjinë pakistaneze. Autoritetet po hetojnë në disa drejtime, ndërsa pista e një krimi të mundshëm mbetet aktualisht ndër hipotezat kryesore.
Alarmi u ngrit rreth orës 13:00, kur shërbimet e emergjencës morën njoftim për një automjet të përfshirë nga flakët në një stacion karburanti. Pas mbërritjes në vendngjarje, zjarrfikësit vunë nën kontroll zjarrin dhe gjatë kontrollit të mjetit zbuluan katër trupat e pajetë.
Në hetime janë angazhuar policia rrugore, skuadrat hetimore të Kozencës dhe Karabinierët, të cilët po punojnë për identifikimin e viktimave dhe sqarimin e plotë të rrethanave të ngjarjes.
Burime pranë hetimit bëjnë të ditur se gjendja e trupave, e rënduar nga dëmtimet e shkaktuara nga zjarri, nuk ka lejuar ende përcaktimin nëse viktimat kanë pësuar plagë nga armë zjarri apo lëndime të tjera përpara se automjeti të përfshihej nga flakët.
Hetuesit theksojnë se elementet e para të mbledhura në vendngjarje nuk mbështesin pistën e një aksidenti të zakonshëm rrugor. Për këtë arsye, pamjet e kamerave të sigurisë të pikës së karburantit dhe të zonave përreth pritet të jenë vendimtare për zbardhjen e ngjarjes.