Tragjedi në det: Dy fëmijë humbin jetën gjatë një udhëtimi me varkë me gjyshërit

Dy fëmijë të vegjël humbën jetën në mënyrë tragjike pas një aksidenti me varkë në New Jersey, SHBA.

Vajza 9-vjeçare dhe djali 7-vjeçar ishin duke udhëtuar me një varkë së bashku me gjyshërit e tyre, kur mjeti lundrues u përplas me një shenjë të Kanalit Ndërbregdetar (Intracoastal Waterway) pranë Berkeley Township.

Si pasojë e përplasjes, dy fëmijët ranë në ujë. Drejtuesi i varkës, Stephen Schneider, 63 vjeç, dhe pasagjerja Laurie Schneider, 64 vjeçe, i nxorën nga uji pa shenja jete. Sipas raportimeve të mediave amerikane, ata dyshohet se ishin gjyshërit e viktimave.

Më herët gjatë mbrëmjes, familja kishte qenë në një restorant në zonë, përpara se të nisej për udhëtimin me varkë.

Fëmijët u transportuan me urgjencë në spital, por mjekët nuk mundën t’u shpëtonin jetën. Autoritetet konfirmuan vdekjen e tyre pas aksidentit.

Policia Shtetërore e New Jersey bëri të ditur se ekipet emergjente ndërhynë pas një telefonate për një aksident të rëndë me mjet lundrues në zonën e gjirit të Berkeley Township, ndërsa hetimet për shkaqet e përplasjes vijojnë.