Mushkonjat nuk i zgjedhin të gjithë njerëzit njësoj: Ja pse disa tërhiqen më shumë
Jo të gjithë njerëzit janë njësoj tërheqës për mushkonjat. Një studim i ri tregon se këto insekte kanë preferenca të ndryshme dhe se faktorët që i bëjnë disa persona më tërheqës mund të ndryshojnë edhe në varësi të llojit të mushkonjës.
Studiuesit analizuan reagimin e tre llojeve të mushkonjave ndaj 119 personave në Miami, duke shqyrtuar sinjalet që insektet përdorin për të identifikuar dhe gjetur njerëzit. Në fokus ishin aroma e trupit, dioksidi i karbonit që çlirohet gjatë frymëmarrjes, temperatura dhe lagështia e trupit, si dhe përbërës të ndryshëm kimikë që gjenden në lëkurë.
Rezultatet treguan se disa persona ishin veçanërisht tërheqës për më shumë se një specie mushkonjash. Megjithatë, asnjë prej pjesëmarrësve nuk ishte ndër më të preferuarit nga të tre llojet, duke treguar se speciet mund të përdorin kombinime të ndryshme sinjalesh për të përcaktuar se cilin person do të afrohen.
Sipas studimit, mushkonja që mund të transmetojë ethet e verdha shfaqi një prirje të lehtë drejt meshkujve, ndërsa mushkonja tigër aziatike rezultoi më e ndjeshme ndaj disa përbërësve kimikë të pranishëm në lëkurë.
Një faktor tjetër që mund të ndikojë është mikrobioma e lëkurës – komuniteti i baktereve dhe mikroorganizmave që jetojnë natyrshëm në trupin e njeriut. Këta mikroorganizma mund të ndikojnë në aromën e lëkurës dhe, si rrjedhojë, në mënyrën se si një person perceptohet nga mushkonjat.
Shkencëtarët shpresojnë se një kuptim më i thellë i këtyre mekanizmave mund të ndihmojë në zhvillimin e mënyrave më efektive për kontrollin e mushkonjave dhe në parandalimin e sëmundjeve që ato mund të transmetojnë, si dengue, Zika, ethet e verdha dhe virusi i Nilit Perëndimor.
Mushkonja tigër aziatike është veçanërisht shqetësuese, pasi është përhapur ndjeshëm në Evropë dhe gjendet edhe në vende të Mesdheut, përfshirë Shqipërinë, Greqinë dhe Italinë.