Kryeministri Edi Rama reagoi pas kritikave të ambasadave të Mbretërisë së Bashkuar dhe Gjermanisë lidhur me vendimin e mazhorancës për të mos miratuar kërkesën për heqjen e lirisë së zëvendëskryeministres Belinda Balluku.
Në një postim në rrjetin X, Rama theksoi se vendimi i marrë nga Kuvendi ishte i drejtë dhe në përputhje me normat kushtetuese dhe ligjore. Ai nënvizoi se Balluku nuk akuzohet për korrupsion dhe se hetimi duhet të vazhdojë pa ndërhyrje apo presione ndaj drejtësisë.
Sipas Ramës, shumica qeverisëse veproi ashtu si do të vepronte çdo parlament demokratik në Europë, duke theksuar se kërkesat e prokurorisë për masa të rënda ndaj deputetëve duhet të kalojnë përmes një procesi serioz dhe jo të miratohen automatikisht.
Kreu i qeverisë shtoi gjithashtu se reforma në drejtësi nuk do të kthehet pas, ndërsa mbështetja për SPAK-un mbetet e palëkundur. Ai theksoi se lufta kundër korrupsionit do të vazhdojë dhe se rruga e Shqipërisë drejt Bashkimit Europian mbetet objektivi kryesor.
“Shqipëria nuk ka plan B. Ecim përpara drejt Bashkimit Europian,” përfundoi Rama.