Situata në Kubë po përkeqësohet ndjeshëm, ndërsa ishulli përballet me një kombinim krizash që përfshijnë tensionet gjeopolitike dhe fatkeqësitë natyrore.
Presidenti amerikan Donald Trump ka rikthyer deklaratat e forta ndaj Kubës, pikërisht në një moment kritik kur vendi po përjeton ndërprerjen e tretë të plotë të energjisë elektrike brenda katër muajsh, si dhe një tërmet me magnitudë 5.8 ballë në brigjet juglindore.
“Besoj se do të kem nderin ta marr Kubën”, u shpreh Trump para gazetarëve, duke e cilësuar ishullin si një shtet të dobësuar. Ai la të hapur mundësinë e një ndërhyrjeje, ndërsa raportime sugjerojnë se mund të jetë i gatshëm edhe për një marrëveshje politike, me kusht largimin e presidentit aktual Miguel Díaz-Canel.
Në këtë klimë presioni, autoritetet në Havana kanë ndërmarrë një hap të pazakontë: lejimin e diasporës kubane për të investuar dhe zotëruar biznese private në vend, një ndryshim i madh nga politika e mëparshme. Vendimi vjen si përgjigje ndaj krizës së thellë energjetike që ka paralizuar jetën e përditshme.
Qeveria kubane fajëson Shtetet e Bashkuara të Amerikës për situatën, duke theksuar ndikimin e sanksioneve dhe kufizimeve në furnizimin me naftë, veçanërisht pas zhvillimeve politike në Venezuela.
Ndërkohë, kriza ka prekur rëndë jetën e qytetarëve: spitalet po shtyjnë operacionet, mungesa e karburantit ka boshatisur rrugët dhe sigurimi i ushqimeve bazë është bërë gjithnjë e më i vështirë. Kjo ka çuar edhe në protesta sporadike dhe përplasje në disa zona të vendit.
Në përpjekje për të ndihmuar popullsinë, priten dy nisma humanitare. Diaspora kubane në Miami synon të dërgojë ndihma me një anije civile, ndërsa një autokolonë ndërkombëtare me emrin “Nuestra América” po përgatitet të transportojë ushqime dhe pajisje mjekësore.
Një delegacion nga Italia, i udhëhequr nga Ilaria Salis dhe Mimmo Lucano, i është bashkuar kësaj nisme për të shprehur solidaritet me popullin kuban.
Edhe pse tërmeti i fundit nuk shkaktoi viktima, ai ka rritur ndjeshëm frikën tek qytetarët, të cilët tashmë po përballen me një situatë shumë të vështirë dhe në kufijtë e mbijetesës.