Tensionet në Lindjen e Mesme janë përshkallëzuar ndjeshëm gjatë natës, pasi Irani ka ndërmarrë një seri sulmesh të fuqishme në disa zona të rajonit. Sulmet kanë goditur objektiva të ndryshme dhe kanë shkaktuar viktima e të plagosur.
Goditjet më të forta janë raportuar në Izrael, ku raketa dhe dronë kanë shënjestruar disa qytete, duke shkaktuar shpërthime të fuqishme dhe panik mes banorëve. Sipas raportimeve paraprake, disa persona kanë humbur jetën dhe dhjetëra të tjerë janë plagosur nga bombardimet, të cilat konsiderohen ndër më të ashprat e muajve të fundit.
Ndërkohë, përplasjet janë zgjeruar edhe në Irak. Një ushtar francez është vrarë në një sulm në rajonin kurd të Irakut verior, pranë Erbilit. Lajmi u konfirmua nga presidenti i Francës, Emmanuel Macron, i cili bëri të ditur se oficeri Arnaud Frion humbi jetën gjatë misionit të tij.
Macron e dënoi ashpër sulmin, duke e cilësuar atë të papranueshëm, dhe theksoi se prania e forcave franceze në Irak është pjesë e koalicionit ndërkombëtar kundër terrorizmit.
“Prania e tyre në Irak është në kuadër të luftës kundër terrorizmit. Lufta në Iran nuk mund të justifikojë sulme të tilla”, deklaroi Macron në një reagim në rrjetin social X.
Sipas tij, përveç ushtarit të vrarë, disa ushtarë të tjerë kanë mbetur të plagosur, megjithëse nuk janë dhënë detaje të tjera për gjendjen e tyre.