Rritet numri i makinave të vjetra që dalin nga qarkullimi në 2026
Drejtoria e Përgjithshme e Shërbimeve të Transportit Rrugor njofton se gjatë muajve janar–shkurt 2026 është rritur ndjeshëm numri i automjeteve të vjetra që janë çregjistruar nga qarkullimi.
Sipas të dhënave zyrtare, në këtë periudhë janë çregjistruar 1.761 mjete, me moshë mesatare rreth 22 vjet, duke shënuar një rritje prej 32.5% krahasuar me të njëjtën periudhë të vitit 2025.
Autoritetet theksojnë se largimi nga qarkullimi i mjeteve të amortizuara është një hap i rëndësishëm për mbrojtjen e mjedisit dhe rritjen e sigurisë në rrugë. Automjetet e vjetra zakonisht kanë standarde më të ulëta sigurie dhe kontribuojnë më shumë në ndotjen e ajrit, ndaj çregjistrimi i tyre ndihmon në përmirësimin e cilësisë së jetesës dhe uljen e rrezikut të aksidenteve.
Ndërkohë, kontrolli teknik mbetet një element kyç për sigurinë në trafik. Gjatë dy muajve të parë të vitit 2026, 16.301 automjete nuk kanë arritur të kalojnë kontrollin teknik, kryesisht për shkak të problemeve me sistemin e shkarkimit të gazrave, mangësi vizuale dhe funksionale, sistemin e drejtimit dhe amortizimit, si dhe defekte në sistemin e frenimit.
Qytetarët mund të kryejnë shumë prej procedurave përmes platformës e-Albania, ku mund të rezervojnë online takimin për shërbimin e nevojshëm.
Autoritetet u bëjnë thirrje drejtuesve të mjeteve që të kontrollojnë rregullisht dokumentacionin dhe gjendjen teknike të automjetit, në mënyrë që ai të jetë gjithmonë i sigurt dhe i gatshëm për qarkullim në rrugë.