SPAK thellon hetimet për udhëtimet e Erion Veliajt, në verifikim mbi 100 dalje jashtë vendit
Prokuroria e Posaçme Kundër Korrupsionit dhe Krimit të Organizuar (SPAK) po vijon hetimet në kuadër të dosjes së njohur si “Veliaj 2”, duke verifikuar të gjitha udhëtimet jashtë vendit të kryebashkiakut të Tiranës gjatë viteve 2022-2023, si dhe shpenzimet e kryera gjatë tyre.
Sipas të dhënave të raportuara nga VNA, nga dokumentacioni i sekuestruar në Bashkinë e Tiranës dhe verifikimet në sistemin TIMS rezulton se Erion Veliaj ka kryer mbi 100 udhëtime në destinacione të ndryshme gjatë kësaj periudhe.
Hetuesit po shqyrtojnë nëse shpenzimet e këtyre udhëtimeve janë deklaruar në përputhje me kërkesat ligjore. Sipas raportimit, një pjesë e konsiderueshme e tyre nuk figuron në deklaratat e pasurisë.
Po sipas burimit, gjatë periudhave kur Veliaj ndodhej jashtë Shqipërisë, në rrjetet sociale dhe kanalet zyrtare të Bashkisë publikoheshin materiale ku ai shfaqej duke zhvilluar aktivitete në Tiranë, si mbjellje pemësh apo inaugurime shkollash e kopshtesh. Hetimet dyshojnë se këto pamje mund të jenë regjistruar më herët dhe publikuar në një moment të mëvonshëm.
Nëse dyshimet e hetuesve provohen, dosja mund të zgjerohet me akuza të reja ndaj Veliajt, i cili ndodhet në paraburgim që prej 10 shkurtit 2025 dhe po ndjek procedurat ligjore për ndryshimin e masës së sigurisë.
Aktualisht, Erion Veliaj është duke u gjykuar në Gjykatën e Posaçme Kundër Korrupsionit dhe Krimit të Organizuar (GJKKO) për 13 akuza penale, së bashku me bashkëshorten e tij dhe disa të pandehur të tjerë.
Ky artikull bazohet në raportimin e publikuar nga VNA.al.
Be First to Comment