Tensionet mes Shteteve të Bashkuara dhe Iranit janë përshkallëzuar sërish, pasi Uashingtoni njoftoi se ka ndërmarrë një valë të re sulmesh ndaj objektivave iraniane, pas një incidenti të rëndë në Ngushticën e Hormuzit.
Sipas autoriteteve amerikane, forcat e Korpusit të Gardës Revolucionare Islamike (IRGC) sulmuan një anije tregtare me flamur të Qipros që po lundronte në këtë rrugë strategjike detare. Ndërkohë, mediat shtetërore iraniane raportojnë se anija ishte ndaluar pasi, sipas tyre, kishte fikur sistemet e identifikimit dhe kishte devijuar nga korridori i miratuar i lundrimit.
Komanda Qendrore e SHBA-së (CENTCOM) bëri të ditur se ky ishte raundi i tretë i operacioneve ushtarake gjatë kësaj jave, si përgjigje ndaj sulmeve të Iranit ndaj anijeve tregtare.
Sipas CENTCOM-it, anija MV GFS Galaxy pësoi dëmtime të rënda në dhomën e motorëve, duke mbetur e paaftë për të vazhduar udhëtimin. Gjithashtu raportohet se një anëtar civil i ekuipazhit rezulton i zhdukur.
Nga ana tjetër, Operacionet Tregtare Detare të Mbretërisë së Bashkuar (UKMTO) njoftuan se ekuipazhi u detyrua të braktiste anijen dhe u largua me një varkë shpëtimi, pas përkeqësimit të situatës.
Ky incident vjen vetëm pak ditë pasi tre cisterna tregtare u sulmuan në të njëjtën zonë, duke rritur edhe më tej tensionet dhe shkaktuar një seri shkëmbimesh ushtarake mes SHBA-së dhe Iranit.
Në një deklaratë të publikuar në rrjetin social X, CENTCOM theksoi se Iranit iu dha një tjetër mundësi për të respektuar angazhimet ndërkombëtare pas incidenteve të mëparshme, por sipas autoriteteve amerikane, Teherani zgjodhi të mos ndryshonte qëndrim.
Deklarata u shpërnda edhe nga Sekretari amerikan i Mbrojtjes, Pete Hegseth, i cili shkroi: “Irani bëri zgjedhjen e gabuar. Tani do të përballet me pasojat.”
Situata në Ngushticën e Hormuzit mbetet tepër e tensionuar, ndërsa komuniteti ndërkombëtar po ndjek me shqetësim zhvillimet që mund të ndikojnë në sigurinë rajonale dhe trafikun detar global.
Be First to Comment