Qeveria e Edi Rama ka marrë një vendim të ri që prek drejtpërdrejt çdo qytetar në Shqipëri. Tashmë, çdo person me banim ose vendqëndrim në territorin e vendit është i detyruar të kryejë vetëdeklarimin e adresës përmes platformës e-Albania.
Ky proces nuk kufizohet vetëm në plotësimin e të dhënave online. Qytetarët duhet gjithashtu të ngarkojnë dokumente që vërtetojnë qëndrimin në adresën e deklaruar. Për pronarët kërkohet certifikata e pronësisë, ndërsa për ata që jetojnë me qira është e detyrueshme kontrata e qirasë.
E njëjta procedurë zbatohet edhe në rast ndryshimi të adresës. Në këto raste, qytetarët duhet të paraqesin dokumente ligjore që provojnë vendbanimin e ri, si kontrata qiraje, marrëveshje bashkëjetese, vendime gjykate apo deklarata noteriale.
Për të garantuar saktësinë e të dhënave, zyrat e gjendjes civile do të shqyrtojnë çdo aplikim brenda 24 orëve. Nëse konstatohet mungesë dokumentacioni ose pasaktësi, qytetari do të njoftohet dhe do të ketë 3 ditë kohë për të plotësuar aplikimin.
Sipas qeverisë, kjo nismë synon të përmirësojë regjistrin e adresave, të rrisë saktësinë e të dhënave dhe të ndihmojë në planifikimin e shërbimeve publike, si zgjedhjet, ndihma ekonomike, arsimi dhe shëndetësia.
Ndërkohë, paralajmërohet se mosrespektimi i këtij detyrimi mund të shoqërohet me masa ndëshkuese ose kufizime në marrjen e shërbimeve publike në të ardhmen.