Në një kohë kur politikat e emigracionit po bëhen gjithnjë e më të ashpra, Bundestagu gjerman po shqyrton heqjen e mundësisë për marrjen e përshpejtuar të nënshtetësisë në rast integrimi të shkëlqyer në shoqëri. Ky rregull ishte vendosur nga qeveria e mëparshme.
Prej më shumë se një viti, në Gjermani ishin në fuqi rregulla të reja që lejonin marrjen e nënshtetësisë pas pesë vitesh qëndrimi, në vend të tetë viteve siç ishte më parë.
Madje, për personat që tregonin përpjekje të veçanta për integrim, natyralizimi mund të arrihej edhe brenda vetëm tre vitesh. Por tashmë, koalicioni i ri mes konservatorëve dhe socialdemokratëve (CDU/CSU dhe SPD) synon ta heqë këtë mundësi.
Ministri i Brendshëm gjerman, Alexander Dobrindt, është shprehur se i ashtuquajturi “natyralizim turbo”, i vendosur nga qeveria e kaluar, ka qenë një gabim.
Megjithatë, qëndrimet për këtë ndryshim mbeten të ndara. Kryetari i Këshillit Gjerman të Ekspertëve për Integrimin dhe Migracionin, Winfried Kluth, e mbështet këtë hap, duke argumentuar se korrigjon perceptimin se shtetësia gjermane merret shumë lehtë.
Nga ana tjetër, studiuesi i migracionit Herbert Brücker nga Instituti për Kërkime të Punësimit paralajmëron se ky ndryshim mund të ulë interesin e profesionistëve të kualifikuar për të zgjedhur Gjermaninë si destinacion.