Rreth 138 milionë euro janë vënë nën sekuestro nga Prokuroria e Posaçme (SPAK) në llogaritë e kompanisë “Albanian Land Development”, që rezulton në pronësi të biznesmenit Redi Struga. Veprimi është ndërmarrë në kuadër të një operacioni të gjerë kundër një grupi të dyshuar për trafik narkotikësh dhe pastrim parash.
Sipas informacionit të hetimit, masa e sekuestrimit është pjesë e një dosjeje më të gjerë, në të cilën janë ekzekutuar gjithsej 20 masa sigurie ndaj personave të ndryshëm të përfshirë në hetim.
Në dokumentacionin hetimor përmendet edhe emri i biznesmenit Artur Shehu, i shpallur në kërkim nga SPAK, për të cilin dyshohet se ka kryer transaksione shitblerjeje pronash me kompaninë në fjalë.
Autoritetet po analizojnë lëvizjet financiare dhe transaksionet e kryera, me synim identifikimin e burimit të fondeve dhe verifikimin e lidhjeve të mundshme me veprimtari të paligjshme që janë objekt i hetimeve.