Erion Isai paraqitet sërish në SPAK, vijojnë hetimet për tenderat dhe denoncimet për tokat
Kryetari i Bashkisë së Kolonjës, Erion Isai, u paraqit këtë të enjte në ambientet e SPAK-ut. Ende nuk dihen arsyet e sakta të thirrjes së tij, por ndaj zyrtarit vendor vijojnë disa procedime që lidhen me ushtrimin e detyrës.
Kujtojmë se në shtator të vitit 2025, Prokuroria e Posaçme i komunikoi Isait akuzën për shkelje të barazisë në tendera. Një nga dosjet kryesore që po hetohet lidhet me procedurat e tenderimit për ujësjellës-kanalizimet në zonën e Kolonjës, për të cilat ai është marrë i pandehur.
Ndaj kryebashkiakut socialist janë depozituar gjithashtu ankesa dhe denoncime nga banorë të disa fshatrave, të cilët pretendojnë se toka janë dhënë në favor të biznesmenëve të caktuar për ndërtimin e parqeve fotovoltaike, në kundërshtim me ligjin.
Sipas SPAK-ut, Isai dyshohet për veprën penale “Shkelje e parimeve të barazisë së pjesëmarrësve në tendera ose ankande publike”. Hetimet janë fokusuar te tenderi i rrugës Korçë–Ersekë dhe ai për ndërtimin e rrjetit të furnizimit me ujë në 13 fshatra të Kolonjës.
Në dosjen hetimore janë përfshirë edhe komunikime të zhvilluara në aplikacionin WhatsApp mes Erion Isait dhe administratores së kompanisë “A & E Engineering”, Entela Çano. Sipas materialeve të publikuara më herët, bisedat tregojnë interesimin e kryebashkiakut për projektet dhe preventivët që lidhen me tenderin e ujësjellësit.
SPAK po vijon hetimet për të zbardhur rolin e secilit person të përfshirë dhe për të verifikuar nëse janë shkelur procedurat ligjore në zhvillimin e këtyre tenderëve publikë.