Deputetja e zgjedhur e Partisë Socialiste në Qarkun e Shkodrës, Marjana Koçeku, ka bërë të ditur se largohet nga grupi parlamentar i PS-së dhe do ta ushtrojë mandatin e saj si deputete e pavarur.
Zhvillimi vjen në prag të mbledhjeve që Partia Socialiste pritet të zhvillojë nesër, ku sipas burimeve, Kryesia do të mblidhet në orën 09:30, ndërsa më pas, në orën 10:00, do të mbahet mbledhja e grupit parlamentar.
Mësohet gjithashtu se Koçeku nuk ka marrë pjesë në aktivitetin e organizuar për 35-vjetorin e themelimit të Partisë Socialiste, i mbajtur në sheshin “Italia” në Tiranë.
Përmes një reagimi publik, ajo ka sqaruar se vendimi i saj lidhet me bindjet dhe parimet që ka ndjekur prej vitesh, duke theksuar se ato mbeten të pandryshuara pavarësisht zhvillimeve politike.
“Prej sot jam deputete e pavarur. Idealet dhe vlerat e mia janë ato që kam pasur dhe i kam shprehur edhe para se të angazhohesha në një parti politike. Janë ato që më përcaktojnë kufijtë e veprimit tim politik”, është shprehur Koçeku.