Rama mbledh drejtuesit politikë të PS-së, në fokus pritet të jenë zhvillimet e fundit politike
Kryeministri Edi Rama do të zhvillojë mëngjesin e së mërkurës një takim me drejtuesit politikë të qarqeve të Partisë Socialiste. Mbledhja është planifikuar të nisë në orën 08:30 dhe do të mbahet në selinë qendrore të PS-së.
Takimi vjen vetëm pak ditë pas mbledhjes së grupit parlamentar socialist dhe zhvillohet në një moment kur situata politike në vend vijon të jetë në qendër të vëmendjes publike.
Megjithëse nuk është bërë e ditur zyrtarisht agjenda e diskutimeve, burime politike sugjerojnë se një nga temat kryesore mund të jenë zhvillimet e fundit në vend, përfshirë protestat qytetare që po vazhdojnë prej disa javësh.
Ndërkohë, në debatet publike është diskutuar edhe çështja e kërkesave të protestuesve për ndryshime politike. Gjatë një interviste televizive, avokati Indrit Sefa u shpreh se, sipas kuadrit aktual kushtetues, largimi i kryeministrit mund të realizohet vetëm përmes dorëheqjes së tij.
Sefa argumentoi se Kushtetuta nuk ofron mekanizma të mjaftueshëm për ndryshimin e pushtetit përmes Parlamentit në kushtet aktuale politike, duke theksuar se presioni publik dhe politik mbetet mjeti kryesor që përdorin protestuesit për të artikuluar kërkesat e tyre.
Ai u ndal gjithashtu te sistemi politik dhe zgjedhor në vend, duke vlerësuar se ndryshimet kushtetuese të vitit 2008 kanë ndikuar në forcimin e rolit të partive të mëdha dhe kanë kufizuar mundësitë e forcave më të vogla politike për t’u përfaqësuar në Parlament.
Mbledhja e së mërkurës pritet të japë sinjale mbi strategjinë dhe qëndrimin që do të mbajë Partia Socialiste përballë zhvillimeve politike të javëve të fundit.
Be First to Comment