Çmimet e naftës kanë shënuar rritje me rreth 1% gjatë tregtimit të mëngjesit në Azi, pasi tensionet në Lindjen e Mesme janë rikthyer në fokus. Shkak u bë deklarata e Presidentit amerikan Donald Trump, i cili të mërkurën tha se marrëveshja e paqes me Iranin kishte “marrë fund”.
Rritja e çmimeve vjen në një periudhë kur raportimet për sulme iraniane ndaj anijeve pranë Ngushticës së Hormuzit kanë shtuar shqetësimet për ndërprerje të mundshme të furnizimit global me naftë.
Nafta e papërpunuar Brent u rrit me rreth 1%, duke arritur në afro 78.80 dollarë për fuçi, ndërsa nafta amerikane (WTI) u ngjit në rreth 74.30 dollarë për fuçi.
Me këtë rritje, çmimet janë rikthyer pranë niveleve të regjistruara në mesin e muajit qershor, përpara se SHBA-ja dhe Irani të njoftonin një marrëveshje të përkohshme për zhvillimin e bisedimeve mbi përfundimin e konfliktit.
Megjithatë, pavarësisht rritjes së fundit, çmimet e naftës mbeten dukshëm më të ulëta se kulmi i arritur në fazat e para të konfliktit, kur një fuçi naftë tregtohej pranë nivelit prej 120 dollarësh.
Be First to Comment