Rama reagon për komentet negative online: “Mos dëmtoni imazhin e turizmit shqiptar”
Kryeministri Edi Rama ka reaguar lidhur me valën e komenteve dhe vlerësimeve negative të publikuara në internet ndaj bizneseve dhe disa destinacioneve turistike në Shqipëri.
Në një postim në rrjetet sociale, Rama u ndal veçanërisht te komentet e publikuara për Kalanë e Rozafës, duke shprehur shqetësimin se veprime të tilla mund të dëmtojnë imazhin e turizmit shqiptar dhe të ndikojnë negativisht te vizitorët.
Sipas tij, publikimi i vlerësimeve negative në mënyrë të organizuar nuk i shërben interesit të vendit dhe rrezikon të dëmtojë një nga sektorët më të rëndësishëm të ekonomisë.
Kryeministri u bëri thirrje institucioneve përgjegjëse që të verifikojnë rastet kur dyshohet për sulme të koordinuara ndaj bizneseve apo pronave publike dhe private në platformat online.
Ai kërkoi që organet e drejtësisë të ndërhyjnë nëse konstatohen shkelje të ligjit, duke theksuar se mbrojtja e imazhit të vendit dhe e sipërmarrjeve është në interes të zhvillimit të turizmit dhe ekonomisë shqiptare.
Be First to Comment