ALARM! Nga vera në ‘dimër’ – stuhi të dhunshme, erëra deri në 110 km/h, breshër, dëme, përmbytje dhe temperatura deri në 15°C

Ndryshim i fortë i motit në Kosovë: Nga temperaturat afrikane te stuhitë dhe rënia e ndjeshme e temperaturave

Masa e nxehta me origjinë nga Afrika Veriore, të cilat sollën temperaturat më të larta të këtij viti në Kosovë, me vlera deri në 37–38°C gjatë fundjavës së kaluar, do të fillojnë të zëvendësohen gradualisht nga masa të ftohta me origjinë polare.

Ky ndryshim i theksuar i motit do të shoqërohet fillimisht me disa sisteme të njëpasnjëshme stuhish, të cilat pritet të sjellin reshje intensive, erëra të forta dhe ulje të temperaturave.

E hëna do të nisë me mot kryesisht me diell, por gjatë pasdites pritet depërtimi i një sistemi të fuqishëm stuhish. Në disa zona mund të ketë rrebeshe shiu, erëra të forta me shpejtësi deri në 90 km/h, breshër dhe shkarkesa të fuqishme elektrike. Për shkak të reshjeve të dendura në intervale të shkurtra, nuk përjashtohen përmbytjet lokale.

Edhe dita e martë do të karakterizohet nga një situatë e paqëndrueshme atmosferike. Pas një mëngjesi me diell, gjatë pasdites pritet kalimi i një fronti të ftohtë, i cili do të sjellë stuhi të fuqishme me erëra që mund të arrijnë deri në 110 km/h, reshje të rrëmbyeshme, breshër dhe rrufe të shpeshta.

Të mërkurën pritet të depërtojë një tjetër front i ftohtë, duke sjellë reshje lokale shiu, erëra të forta dhe vranësira të ndryshueshme. Gjatë ditës do të ketë edhe intervale me diell, ndërsa temperaturat maksimale do të pësojnë rënie.

Të enjten pritet një përmirësim i përkohshëm i motit, me më shumë intervale me diell dhe rritje graduale të temperaturave.

Megjithatë, të premten një masë e fuqishme ajrore e ftohtë polare, e shoqëruar me një sistem me presion të ulët nga Italia, pritet të sjellë reshje shiu në shumë zona të vendit dhe rënie të ndjeshme të temperaturave. Temperaturat maksimale parashikohet të zbresin në 15–20°C.

Gjatë fundjavës pritet përmirësim i motit dhe rritje graduale e temperaturave, por të dielën në mbrëmje mund të fillojë sërish një destabilizim i kushteve atmosferike.

Era do të fryjë nga drejtime të ndryshme, ndërsa gjatë të hënës dhe sidomos të martës, në zonat e prekura nga stuhitë, mund të arrijë shpejtësi deri në 110 km/h.

Autoritetet dhe qytetarët këshillohen të tregojnë kujdes gjatë kalimit të stuhive, pasi përkeqësimi i motit mund të ndodhë shumë shpejt. Erërat e forta mund të shkaktojnë dëmtime në pemë, çati, sera dhe struktura të lehta, ndërsa objektet e palidhura mund të paraqesin rrezik për njerëzit dhe automjetet. Gjithashtu mund të ketë probleme në infrastrukturën elektrike, ndërprerje të energjisë dhe vështirësi në qarkullim.

Temperaturat minimale gjatë javës pritet të lëvizin nga 10 deri në 18°C, ndërsa maksimalet nga 15 deri në 35°C. Temperaturat më të larta do të regjistrohen në fillim të javës, ndërsa rënia më e madhe pritet të ndodhë të premten.