Uashingtoni dhe Brukseli në një zë: Mbështetje e fortë për Kosovën

Kosova merr mbështetje nga BE-ja dhe SHBA-ja, por përballet me kritika për ngërçin politik

Kosova ka marrë një sinjal të fortë mbështetjeje nga Bashkimi Evropian dhe Shtetet e Bashkuara, ndërsa njëkohësisht është vënë përballë kritikave për bllokadën politike dhe vonesat në funksionimin e institucioneve.

Komiteti për Punë të Jashtme i Parlamentit Evropian miratoi raportin për Kosovën, të hartuar nga eurodeputeti Riho Terras. Dokumenti vlerëson progresin e arritur nga vendi, por shpreh shqetësim për krizën politike dhe ritmin e ngadaltë të reformave. Sipas raportit, mosfunksionimi i plotë i institucioneve ka bërë që Kosova të humbasë mundësi të rëndësishme në procesin e integrimit evropian.

Megjithatë, raporti riafirmon mbështetjen për perspektivën evropiane të Kosovës dhe u bën thirrje shteteve anëtare të BE-së të avancojnë procedurat për dhënien e statusit të vendit kandidat. Dokumenti mirëpret gjithashtu heqjen e masave të BE-së ndaj Kosovës, nënvizon rëndësinë e vazhdimit të dialogut me Serbinë dhe kërkon që përgjegjësit për sulmin në Banjska të dalin para drejtësisë.

Edhe në Uashington, Kosova ishte pjesë e diskutimeve gjatë një seance dëgjimore në Kongresin amerikan, ku mori pjesë Sekretari i Shtetit, Marco Rubio. Kongresmeni Keith Self, pas vizitës së tij në Kosovë dhe vendet e rajonit, kërkoi mbështetje për anëtarësimin e Kosovës në NATO, duke theksuar se Ballkani Perëndimor mbetet një rajon me rëndësi strategjike për sigurinë.

Nga ana e tij, Rubio deklaroi se zgjerimi i NATO-s nuk është aktualisht ndër prioritetet kryesore të aleancës, por shtoi se kjo nuk e përjashton mundësinë e anëtarësimit të Kosovës në të ardhmen. Ai rikonfirmoi gjithashtu angazhimin e Shteteve të Bashkuara për ruajtjen e paqes dhe stabilitetit në Ballkanin Perëndimor.

Ndërkohë, në Kongresin amerikan është dorëzuar një rezolutë nga kongresmenët Keith Self, Ritchie Torres dhe Mike Lawler, e cila shpreh mbështetje për anëtarësimin e Kosovës në NATO, duke e cilësuar atë si një hap të rëndësishëm për forcimin e sigurisë në Evropën Juglindore.