# Tragjedi në SHBA: Tre fëmijë shqiptarë humbin jetën në zjarr, familja në gjendje kritike
Një ngjarje e rëndë ka tronditur një familje me origjinë shqiptare në Shtetet e Bashkuara. Tre fëmijë humbën jetën dhe dy fëmijë të tjerë, së bashku me dy të rritur, ndodhen në gjendje kritike pas një zjarri të fuqishëm që përfshiu banesën e familjes në Jacksonville, Florida.
Sipas shefit të Departamentit të Zjarrfikësve dhe Shpëtimit në Jacksonville, Percy Golden, alarmi u dha rreth orës 05:15 të mëngjesit të së mërkurës. Ekipet e emergjencës mbërritën pak minuta më vonë dhe gjetën katin e parë të banesës të përfshirë nga flakët, ndërsa kati i dytë ishte mbushur me tym.
Dy të rritur dhe dy fëmijë kishin mundur të dilnin nga banesa para mbërritjes së zjarrfikësve. Gjatë kontrollit të ndërtesës, ekipet e shpëtimit gjetën tre fëmijët e tjerë pa shenja jete. Autoritetet nuk kanë bërë ende të ditur moshat e viktimave.
Pamjet nga vendngjarja tregojnë dhimbjen e madhe të familjarëve. Mediat amerikane raportojnë se të afërmit kanë konfirmuar origjinën shqiptare të familjes dhe se tre fëmijët që humbën jetën ishin djem.
Një fqinj ka treguar se banorët e zonës u përpoqën të ndihmonin familjen gjatë momenteve dramatike. Sipas dëshmisë së tij, disa persona arritën të kapnin një foshnjë dhe një të rritur, të cilët u hodhën nga dritarja e katit të dytë për t’u shpëtuar flakëve.
Zjarri u vu nën kontroll rreth orës 05:40, por banesa u shkatërrua plotësisht. Flakët dëmtuan edhe dy banesa ngjitur, ndërsa ekipet e emergjencës vijuan punën në zonë edhe pas shuarjes së zjarrit.
Kryqi i Kuq Amerikan po ofron ndihmë për shtatë të rritur dhe gjashtë fëmijë, të cilët mbetën pa strehë si pasojë e kësaj tragjedie.
Shkaku i zjarrit ende nuk është përcaktuar dhe autoritetet kanë nisur hetimet për të zbardhur rrethanat e ngjarjes.
“Nuk ka fjalë që mund ta lehtësojnë dhimbjen e një mëngjesi si ky. Mendimet tona janë me familjet që humbën të dashurit e tyre, me të plagosurit, me ata që mbetën pa strehë dhe me zjarrfikësit që u përballën me këtë ngjarje tragjike”, thuhet në reagimin e Departamentit të Zjarrfikësve dhe Shpëtimit në Jacksonville.