TRAGJEDIA NË MALISHEVË/ Ndërron jetë 26-vjeçari i dyshuar për vrasjen e bashkëshortes shtatzënë
Egzon Bytyçi, 26-vjeçari i dyshuar për vrasjen e bashkëshortes së tij shtatzënë, Jetlira Foniqi, ka ndërruar jetë mbrëmjen e së enjtes në Qendrën Klinike Universitare të Kosovës.
Lajmi është konfirmuar nga drejtori i Mjekimit në QKUK, Shaqir Uka, i cili bëri të ditur se i riu nuk ka mundur t’u mbijetojë plagëve të marra.
“Egzon Bytyçi ka vdekur në orët e mbrëmjes së sotme pasi nuk ka arritur t’u bëjë ballë plagëve”, është shprehur Uka.
Ngjarja e rëndë ndodhi më 23 gusht në fshatin Kërvasari të Malishevës. Policia është njoftuar rreth orës 23:20, ndërsa çifti është gjetur i plagosur me armë zjarri brenda dhomës së gjumit.
Sipas informacioneve të bëra publike pas ngjarjes, dyshohet se Bytyçi ka qëlluar me armë bashkëshorten e tij, Jetlira Foniqin, dhe më pas ka qëlluar veten në kokë. Rastin në Polici e kishte raportuar babai i 26-vjeçarit, ndërsa në vendngjarje është sekuestruar edhe një armë zjarri.
Jetlira Foniqi u transportua me urgjencë drejt QKUK-së, por nuk arriti t’u mbijetonte plagëve. 25-vjeçarja ishte në javën e 34-t të shtatzënisë dhe ndodhej vetëm pak javë para lindjes. Ajo ndërroi jetë pak kohë pasi mbërriti në Emergjencë.
Ndërkohë, 26-vjeçari qëndroi për disa ditë në gjendje kritike dhe mori trajtim mjekësor në Qendrën Emergjente. Më 25 gusht, QKUK njoftoi se gjendja e tij shëndetësore vijonte të ishte e rëndë dhe pa ndryshime të rëndësishme. Dy ditë më vonë, ai ndërroi jetë.
Për motivin e ngjarjes, hetimet vijojnë. Në raportimet e para në mediat e Kosovës është përmendur edhe pista e xhelozisë, ndërsa janë raportuar gjithashtu konflikte të mëparshme mes çiftit. Familjarët e Jetlirës kanë deklaruar se nuk kishin qenë në dijeni për probleme të tilla.
Në media janë publikuar edhe pretendime të familjarëve të Bytyçit lidhur me probleme të mëparshme të shëndetit mendor gjatë kohës që ai kishte jetuar në Gjermani. Megjithatë, Policia ka sqaruar se këto pretendime nuk janë verifikuar dhe nuk përbëjnë një diagnozë mjekësore apo një shkak të konfirmuar të tragjedisë.