MONEDHA ME PORTRETIN E TRUMP DEL NË SHITJE/ Ja sa kushton dhe çfarë paraqet
Një monedhë përkujtimore me vlerë nominale një dollar dhe me portretin e Presidentit Donald Trump ka dalë në shitje në kuadër të aktiviteteve për 250-vjetorin e themelimit të Shteteve të Bashkuara të Amerikës, raportojnë mediat ndërkombëtare.
Monedhat e koleksionit mund të blihen në pako me 25 ose 100 copë, me çmime përkatësisht 61 dhe 154 dollarë.
Sipas dokumenteve të publikuara nga Komisioni për Artet e Bukura, njëra anë e monedhës paraqet shqiponjën, simbolin kombëtar të SHBA-së, ndërsa në anën tjetër është vendosur portreti i Donald Trump.
Imazhi i Trump ngjan me portretin e tij zyrtar dhe është frymëzuar nga një fotografi e marrë nga autoritetet në Gjeorgji gjatë hetimit për akuzat për ndërhyrje në zgjedhjet presidenciale të vitit 2020.
Dizajni i monedhës u miratua në mars nga Komisioni për Artet e Bukura, anëtarët e të cilit janë emëruar nga Trump.
Në atë kohë, përfaqësuesi i Thesarit amerikan Brandon Rich deklaroi se monedhat synojnë të simbolizojnë “frymën e vendit” dhe demokracinë amerikane, duke shtuar se portreti i Trump ishte zgjedhja më ikonike për këtë seri.
Megjithatë, projekti ka shkaktuar edhe debat. Në fund të shkurtit, Komiteti Këshillimor i Qytetarëve për Monedhat (CCAC), një tjetër organ këshillues për dizajnet e monedhave amerikane, refuzoi të shqyrtonte propozimin për një monedhë me portretin e Trump.
Anëtari i këtij komiteti, Donald Scarinci, argumentoi se historikisht Shtetet e Bashkuara nuk kanë vendosur në monedha imazhin e një presidenti të zgjedhur demokratikisht ndërsa ai është ende në detyrë.
Sipas tij, një praktikë e tillë lidhet zakonisht me monarkitë ose regjimet diktatoriale, duke e bërë monedhën me portretin e Trump një rast të veçantë në historinë monetare amerikane.
