Kryeministri i Polonisë, Donald Tusk, ka paralajmëruar për mundësinë e shtimit të sulmeve ruse ndaj Ukrainës dhe vendeve që e mbështesin atë gjatë javëve të ardhshme.
Duke folur në parlamentin polak në Varshavë, Tusk tha se të dhënat e inteligjencës tregojnë për një rrezik real që dronë ose raketa të devijojnë drejt territorit të vendeve të krahut lindor të NATO-s, përfshirë Poloninë, duke shkaktuar edhe dëme.
Sipas kryeministrit polak, në një situatë të tillë Rusia mund ta paraqesë incidentin si një aksident, duke argumentuar se nuk ka arsye për një reagim të Aleancës.
Tusk shprehu shqetësim të veçantë për përdorimin gjithnjë e më të madh të dronëve me motorë reaktivë. Sipas tij, këto mjete fluturojnë në lartësi dhe shpejtësi më të mëdha, duke e bërë më të vështirë zbulimin e tyre nga sistemet e mbrojtjes ajrore.
Ai theksoi se paralajmërimet e tij bazohen në informacione të siguruara nga agjencitë polake, ukrainase dhe amerikane, si dhe nga NATO.
Tusk paralajmëroi gjithashtu se fundi i vjeshtës dhe dimri mund të përbëjnë një periudhë veçanërisht të rëndësishme në zhvillimin e luftës Rusi-Ukrainë.
Paralajmërimi vjen pasi dronë rusë u raportuan pranë pikës kufitare ukrainase me Poloninë, në Yahodyn. Incidenti shkaktoi aktivizimin e sirenave të alarmit edhe në territorin polak, ndërsa avionë luftarakë u ngritën në ajër.
Komanda e Forcave Ajrore Polake bëri të ditur se avionët u aktivizuan sërish për shkak të aktivitetit të dronëve rusë mbi territorin e Ukrainës, ndërsa sistemet e mbrojtjes ajrore u vunë në gatishmëri.
Sipas Tusk, Rusia po përqendron një pjesë të sulmeve në zonat pranë pikave kufitare mes Ukrainës dhe vendeve fqinje evropiane. Vetëm gjatë javës së kaluar janë raportuar katër incidente në kufirin polako-ukrainas, ndërsa autoritetet polake vlerësojnë se sulmet synojnë të pengojnë linjat e furnizimit të Ukrainës.