Ambasada Amerikane me një njoftim të rëndësishëm për të gjithë shqiptarët

Ambasada e SHBA-së del me paralajmërim për shqiptarët që udhëtojnë me vizë turistike

Ambasada e Shteteve të Bashkuara në Tiranë ka publikuar një njoftim të rëndësishëm për qytetarët shqiptarë që udhëtojnë në SHBA me vizë turistike.

Sipas përfaqësisë diplomatike amerikane, përdorimi i vizës turistike për qëllime që nuk përputhen me deklarimin e bërë gjatë aplikimit mund të sjellë pasoja në të ardhmen, përfshirë edhe refuzimin e rinovimit të vizës.

Ambasada thekson se disa shtetas udhëtojnë drejt SHBA-së për të lindur fëmijët atje dhe mbulojnë shpenzimet mjekësore përmes programeve publike, si Medicaid. Sipas autoriteteve amerikane, këto programe financohen nga taksapaguesit amerikanë dhe përdorimi i tyre në këto rrethana mund të ndikojë negativisht në vlerësimin e kërkesave të ardhshme për vizë.

Në njoftim rikujtohet se viza turistike duhet të përdoret vetëm për qëllimin për të cilin është lëshuar. Çdo përdorim në kundërshtim me kushtet e saj ose përfitimi i padrejtë nga programet publike mund të merret në konsideratë gjatë shqyrtimit të aplikimeve të ardhshme për hyrje ose rinovim të vizës.

Autoritetet amerikane u bëjnë thirrje aplikantëve të respektojnë rregullat e vizës dhe të deklarojnë saktë qëllimin e udhëtimit për të shmangur probleme në procedurat e ardhshme.