Ilija Srdanoviç, kardiolog dhe profesor në Fakultetin e Mjekësisë në Novi Sad, është figura që, sipas raportimeve, udhëhoqi “Listën e Studentëve” drejt fitores në Serbi, duke sfiduar dominimin politik të Aleksandar Vuçiçit, i cili ka qenë në pushtet për 14 vite.
Kush është Ilija Srdanoviç?
Angazhimi i tij në politikë mori një tjetër drejtim pas mbështetjes publike për protestat studentore kundër korrupsionit në Serbi. Në shtator të vitit 2026, Srdanoviç u prezantua si drejtues i listës së pavarur studentore, duke përfaqësuar një lëvizje që kërkon reforma në funksionimin e institucioneve dhe në drejtimin e vendit.
Platforma e tij politike përqendrohet te decentralizimi i sistemit shëndetësor, si dhe te mbrojtja e interesave kombëtare, të cilat sipas tij duhet të kenë përparësi përpara një integrimi të menjëhershëm në Bashkimin Evropian.
Gjatë një takimi me studentët në Novi Sad, ku u prezantua si kandidat, Srdanoviç foli edhe për tragjedinë e stacionit hekurudhor të qytetit. Shembja e një strehe betoni në këtë stacion shkaktoi vdekjen e 16 personave, duke nxitur protesta masive dhe kërkesa për përgjegjësi nga institucionet.
Ai theksoi se, gati dy vjet pas ngjarjes tragjike, qytetarët serbë vazhdojnë të kërkojnë drejtësi dhe përgjigje për atë që ndodhi, ndërsa çështja e përgjegjësisë mbetet një nga temat kryesore të debatit politik në vend.