Ish-ministrja e Jashtme e Shqipërisë, Elisa Spiropali, ka reaguar ashpër në Kuvend, duke iu përgjigjur me tone të forta deputetit të Partisë Demokratike, Gazment Bardhi.
Gjatë replikës së saj, Spiropali deklaroi se askush nuk mund ta shantazhojë, duke iu referuar edhe debateve të fundit lidhur me votimin e reformës territoriale dhe pretendimeve për presione ndaj deputetëve socialistë.
“Të jesh i sigurt që nuk ka njeri këtu që mund të më shantazhojë mua”, u shpreh Spiropali nga foltorja e Kuvendit.
Ajo iu drejtua drejtpërdrejt Bardhit, duke pretenduar se edhe ai dhe drejtues të Partisë Demokratike në Fier janë përballur me shantazhe gjatë fushatës së kaluar elektorale.
“As ata nuk më shantazhojnë dot, se do të shkojnë aty ku e kanë vendin”, deklaroi ish-ministrja, duke shtuar se qëndron pas çdo fjale që ka thënë më parë.
Në vijim, Spiropali kritikoi opozitën, duke pretenduar se ajo nuk guxon të shprehet për çështje të caktuara dhe se Partia Demokratike është e përqendruar te një person i vetëm në krye të saj.
Deklaratat e saj shkaktuan reagime në sallën e Kuvendit, në një seancë të shoqëruar nga debate të forta politike për reformën territoriale dhe marrëdhëniet mes mazhorancës dhe opozitës.