Analisti turk komenton projektin e Sazanit: “Pas investimit fshihen edhe interesa gjeopolitike”
Gazetari dhe analisti turk İbrahim Karagül ka reaguar lidhur me projektin e planifikuar për zhvillimin e Ishullit të Sazanit, duke argumentuar se debati rreth tij shkon përtej aspektit turistik dhe ekonomik.
Sipas Karagülit, investimi i lidhur me Jared Kushner, dhëndrin e Presidentit amerikan Donald Trump, duhet parë edhe në prizmin e zhvillimeve gjeopolitike që po ndikojnë rajonin e Mesdheut dhe Ballkanit.
“Nuk bëhet fjalë vetëm për një projekt turistik. Sazani ka një pozicion strategjik që i jep rëndësi të veçantë në Adriatik”, shprehet ai.
Në analizën e tij, Karagül pretendon se rajoni po përjeton ndryshime të reja në raportet e influencës ndërkombëtare dhe se investime të tilla mund të kenë ndikim në ekuilibrat strategjikë mes aktorëve të ndryshëm rajonalë dhe globalë.
Ai vlerëson se Shqipëria mund të fitojë një rol më të rëndësishëm në këto dinamika, ndërsa nënvizon se projektet në Sazan dhe Zvërnec po shihen me interes jo vetëm për potencialin ekonomik, por edhe për dimensionin e tyre gjeopolitik.
Karagül shton se zhvillimet rreth këtyre projekteve duhen analizuar në një kontekst më të gjerë ndërkombëtar, përtej debateve që lidhen vetëm me investimet dhe turizmin.