Java ka nisur me temperatura shumë të larta dhe një valë të fortë të nxehti që ka përfshirë rajonin, si pasojë e masave ajrore të ardhura nga Afrika Veriore. Megjithatë, sipas parashikimeve meteorologjike, kjo valë nuk pritet të zgjasë shumë në Kosovë, Shqipëri dhe Maqedoninë e Veriut, ndryshe nga disa vende të Evropës.
E hëna shënon kulmin e temperaturave, me vlera që në Kosovë mund të arrijnë deri në 38°C, ndërsa në Shqipëri dhe Maqedoninë e Veriut deri në 40°C. Gjatë orëve të mbrëmjes pritet shtim i vranësirave dhe në disa zona mund të zhvillohen rrebeshe të izoluara shiu, të shoqëruara me vetëtima dhe bubullima.
Edhe dita e martë do të mbetet shumë e nxehtë, por atmosfera do të bëhet më e paqëndrueshme. Vranësirat do të shtohen gradualisht dhe në shumë zona priten stuhi lokale, me rrebeshe shiu, vetëtima dhe bubullima. Temperaturat do të pësojnë një rënie të lehtë, duke zbritur rreth 36°C në Kosovë, ndërsa lagështia e lartë do ta bëjë vapën të ndihet edhe më rëndë.
Shtrëngata të fuqishme lokale parashikohen jo vetëm në Kosovë, por edhe në pjesë të Shqipërisë, Maqedonisë së Veriut, Luginës së Preshevës dhe Malit të Zi. Në disa zona ekziston rreziku për reshje intensive në një kohë të shkurtër, erëra të forta dhe breshër.
Edhe e mërkura do të karakterizohet nga mot i paqëndrueshëm. Temperaturat do të vazhdojnë të bien gradualisht, ndërsa zhvillimi i vranësirave konvektive do të sjellë reshje shiu dhe stuhi me bubullima. Gjatë ditës pritet të nisë largimi i masave të nxehta afrikane dhe depërtimi i ajrit më të freskët.
Ndryshimi më i madh pritet të enjten, kur një front i ftohtë atmosferik do të përfshijë rajonin. Parashikohen ulje të ndjeshme të temperaturave, reshje më të përhapura shiu, stuhi me vetëtima dhe bubullima, ndërsa në disa zona reshjet mund të jenë intensive.
Të premten moti do të jetë dukshëm më i freskët dhe më i këndshëm. Reshjet do të humbasin gradualisht intensitetin, ndërsa do të ketë intervale me diell dhe vranësira kalimtare.
Fundjava pritet të jetë më e qëndrueshme, me mot kryesisht të kthjellët dhe temperatura më të përballueshme. Edhe pse do të ketë një rritje graduale të temperaturave, ato nuk pritet të arrijnë nivelet ekstreme të fillimit të javës.
Sipas parashikimeve aktuale, java do të karakterizohet nga një kontrast i fortë mes vapës së ditëve të para dhe freskimit që pritet në gjysmën e dytë të saj. Gjithashtu, në disa zona nuk përjashtohet zhvillimi i stuhive të forta me vetëtima, bubullima, erëra intensive dhe breshër, ndaj qytetarët këshillohen të ndjekin njoftimet më të fundit të shërbimeve meteorologjike.
Be First to Comment