Një 42-vjeçar është dënuar me burgim të përjetshëm të rënduar pasi u shpall fajtor për vrasjen e një 17-vjeçareje, trupin e së cilës e kishte hedhur më pas në një pus.
Ngjarja tronditëse u zbulua në tetor të vitit të kaluar, kur banorë të zonës gjetën trupin e vajzës. Sipas hetimeve, autori i krimit rezultoi të ishte një person me precedentë të rëndë penalë, i dënuar më parë për disa vrasje. Ai ishte liruar përkohësisht nga burgu me leje, por nuk ishte kthyer më në institucionin e vuajtjes së dënimit.
Gjatë procesit gjyqësor, 42-vjeçari pranoi se kishte pasur një debat me 17-vjeçaren dhe deklaroi se gjatë konfliktit e kishte kapur për fyti, duke thënë se nuk mbante mend sa kohë kishte zgjatur veprimi.
Më pas, ai tregoi se kishte përdorur një çekiç për të hapur kapakun e pusit dhe kishte hedhur trupin e viktimës brenda, përpara se të largohej nga vendi i ngjarjes.
Gjykata e shpalli fajtor për vrasje të qëllimshme ndaj një të miture dhe vendosi dënimin maksimal, burgim të përjetshëm të rënduar. Ndërkohë, një tjetër i akuzuar u dënua me një vit burg për fshehje të provave, ndërsa dy persona të tjerë u shpallën të pafajshëm.
Be First to Comment