Një ngjarje tragjike është shënuar në Liqenin e Komanit, ku një 20-vjeçar nga Kosova, Ledri Duraku, dyshohet se ka humbur jetën si pasojë e mbytjes në ujërat e liqenit.
Sipas të dhënave paraprake, i riu ndodhej në Koman së bashku me disa miq kur ka ndodhur incidenti. Për momentin, rrethanat e sakta të ngjarjes mbeten ende të paqarta dhe pritet të sqarohen nga autoritetet.
Lajmi për vdekjen e parakohshme të 20-vjeçarit ka shkaktuar tronditje dhe dhimbje te familjarët, miqtë dhe të gjithë ata që e kanë njohur.
Për humbjen e tij ka reaguar edhe SHMLT “Nexhmedin Nixha”, ku Ledri kishte ndjekur mësimet. Shkolla ka shprehur ngushëllimet për familjen dhe të afërmit e tij.
“Me pikëllim të thellë morëm lajmin për ndarjen tragjike nga jeta të ish-nxënësit të shkollës sonë, Ledri Duraku. Humbja e një të riu është një dhimbje e madhe dhe e vështirë për t’u përshkruar me fjalë”, thuhet në mesazhin e ngushëllimit.
Sipas informacioneve të para, 20-vjeçari ka përfunduar në ujë në rrethana që ende nuk janë bërë të qarta dhe nuk ka mundur të shpëtojë.
Nuk dihet ende me saktësi se si ka ndodhur incidenti dhe nëse personat që ndodheshin me të kanë tentuar t’i japin ndihmë. Për këtë arsye, dinamika e plotë e ngjarjes pritet të zbardhet pas veprimeve hetimore.
Liqeni i Komanit është një nga zonat turistike më të frekuentuara gjatë muajve të verës, duke tërhequr vizitorë të shumtë, përfshirë edhe turistë nga Kosova.
Humbja e Ledri Durakut në moshë kaq të re ka prekur rëndë familjen, miqtë dhe komunitetin ku ai ishte rritur dhe kishte ndjekur shkollimin.
Autoritetet pritet të japin më shumë informacion për rrethanat e .ngjarjes në vijim.