Rikthehet në rrjet deklarata e Bojana Stefanovskës për historinë e Maqedonisë dhe shqiptarëve
Një deklaratë e Bojana Stefanovskës, e bërë disa vite më parë, është rikthyer së fundmi në rrjetet sociale, duke hapur diskutime të reja mbi historinë e Maqedonisë, shtetësinë e saj dhe historinë e shqiptarëve në Ballkan, raporton INA.
Në deklaratën që po qarkullon online, Stefanovska kishte bërë një krahasim mes historisë shtetërore të Maqedonisë dhe asaj shqiptare, duke iu referuar periudhës së Jugosllavisë dhe historisë më të hershme të shqiptarëve.
“Maqedonia është formuar nga Tito (1945), ka 73 vjet histori, nga ato 73 vjet ka vetëm 27 vjet histori si shtet. Shqiptarët e kanë shtetin me histori 106-vjeçare, si dhe kanë 3000 vite histori, e edhe Helenët e kanë njëlloj”, thuhet në deklaratën e atribuar Stefanovskës.
Përtej deklaratës, historia e shtetësisë së Maqedonisë së Veriut lidhet me formimin e saj si njësi federale e Jugosllavisë gjatë Luftës së Dytë Botërore. Procesi institucional lidhet me ASNOM-in në vitin 1944, ndërsa pavarësia u shpall në vitin 1991, pas referendumit të 8 shtatorit.
Ndërsa shteti modern shqiptar e ka pikënisjen në Shpalljen e Pavarësisë më 28 nëntor 1912.
Sa i përket referimit për “3000 vite histori shqiptare”, kjo është pjesë e një debati më të gjerë historiografik mbi prejardhjen dhe vazhdimësinë e shqiptarëve në Ballkan. Kjo periudhë historike nuk duhet barazuar me moshën e shtetit shqiptar, i cili u shpall i pavarur në vitin 1912.
Rikthimi i deklaratës në rrjetet sociale ka ringjallur diskutimet mbi historinë, identitetin dhe shtetësinë e popujve të Ballkanit.