Ndryshimi i orës këtë vit vjen më herët: Ja kur kthehen akrepat
Ndryshimi nga ora verore në atë dimërore do të bëhet këtë vit në fund të tetorit. Në natën mes 24 dhe 25 tetorit 2026, akrepat e orës do të kthehen 60 minuta pas.
Në Shqipëri, në orën 03:00, ora do të bëhet 02:00. Si rezultat, atë natë do të kemi një orë më shumë në dispozicion për gjumë.
Data 25 tetor është ndër datat më të hershme të mundshme për kalimin në orën dimërore, pasi ndryshimi kryhet të dielën e fundit të muajit tetor. Një kalim në këtë datë kishte ndodhur edhe në vitin 2020.
Çfarë ndryshon pas kthimit të akrepave?
Me kalimin në orën dimërore, mëngjeset do të kenë më shumë dritë, ndërsa errësira do të bjerë më herët gjatë pasdites dhe mbrëmjes.
Ndryshimi i orës realizohet gjatë fundjavës për të minimizuar ndikimin në punë, shkollë, udhëtime dhe aktivitetet e përditshme.
Si mund të ndikojë te gjumi?
Edhe pse ndryshimi është vetëm një orë, organizmit mund t’i duhet pak kohë për t’u përshtatur me orarin e ri. Disa persona mund të përjetojnë përkohësisht lodhje, përgjumje, vështirësi në përqendrim ose ndryshime në ritmin e gjumit.
Ndikimi mund të ndihet më shumë te fëmijët, të moshuarit, personat që kanë probleme me gjumin dhe ata që punojnë me turne.
Për një përshtatje më të lehtë, rekomandohet të ruhet një orar i rregullt gjumi, të ekspozoheni ndaj dritës natyrore gjatë ditës dhe të shmangni kafenë dhe vaktet e rënda në orët e vona të mbrëmjes.
Edhe aktiviteti i lehtë fizik gjatë ditës mund të ndihmojë në ruajtjen e një ritmi më të qëndrueshëm të gjumit.