Ngjarje e rëndë! Të paktën 28 persona humbin jetën në zjarrin në një fabrikë këpucësh

Tragjedi në Kinë, zjarri në një fabrikë këpucësh u merr jetën të paktën 28 personave

Të paktën 28 persona kanë humbur jetën pas një zjarri të fuqishëm që përfshiu një fabrikë këpucësh në qytetin Jinjiang, në provincën Fujian, në lindje të Kinës.

Sipas autoriteteve, flakët shpërthyen rreth mesditës në fabrikën Huiteng Shoes, ndërsa për disa orë pati shqetësime se brenda godinës shumëkatëshe ndodheshin ende punonjës të bllokuar.

Pamjet e publikuara nga televizioni shtetëror kinez CCTV tregojnë zjarrfikësit duke luftuar me flakët dhe re të dendura tymi që mbuluan zonën. Në disa momente u panë persona që kërkonin shpëtim pranë dritareve dhe në çatinë e ndërtesës, ndërsa zjarri përhapej me shpejtësi në katet e poshtme.

Në operacionin e shpëtimit u angazhuan 183 zjarrfikës dhe efektivë të emergjencës, të mbështetur nga 35 automjete zjarrfikëse. Ekipet punuan për orë të tëra për të vënë flakët nën kontroll, për të kërkuar të mbijetuar dhe për të transportuar të plagosurit drejt spitaleve.

Presidenti i Kinës, Xi Jinping, e cilësoi ngjarjen një tragjedi të rëndë dhe kërkoi zbardhjen e plotë të shkaqeve të zjarrit, si dhe marrjen e masave ligjore ndaj çdo personi që mund të ketë përgjegjësi.

Autoritetet kineze kanë nisur hetimet për të përcaktuar se çfarë e shkaktoi zjarrin, ndërsa operacionet në vendngjarje vazhduan deri në sigurimin e plotë të objektit.

Ngjarja rikthen në vëmendje shqetësimet për sigurinë në vendet e punës në Kinë, ku muajt e fundit janë regjistruar disa incidente të rënda me pasoja tragjike.