Vuçiq: Serbia pret marrëveshje të re me Rusinë për furnizimin me gaz
Presidenti i Serbisë, Aleksandar Vuçiq, ka deklaruar se vendi i tij pret të nënshkruajë së shpejti një kontratë afatshkurtër me Rusinë për furnizimin me gaz.
Sipas Vuçiqit, marrëveshja e re pritet të garantojë furnizimin me gaz të qytetarëve dhe bizneseve të paktën deri në verë. Ai tha se kontrata e mëparshme për furnizimin me gaz kishte përfunduar në maj dhe se deri tani nuk ishte arritur një marrëveshje e re.
Presidenti serb u shpreh se oferta e re nga pala ruse pritet të jetë me “çmime të mira”, duke e konsideruar marrëveshjen të rëndësishme për sigurinë energjetike të vendit.
Vuçiq foli gjithashtu për situatën me kompaninë ruse Lukoil dhe sektorin e naftës në Serbi. Sipas tij, Shtetet e Bashkuara kanë zgjatur licencën për operimin e kompanisë deri më 26 prill të vitit të ardhshëm, gjë që, sipas presidentit serb, ndihmon në garantimin e furnizimit me derivate.
Ai theksoi se Lukoil ka 112 pika karburanti në Serbi dhe se autoritetet synojnë të shmangin çdo mungesë të karburanteve në treg.
Sa i përket kompanisë NIS, e cila është prekur nga sanksionet amerikane, Vuçiq deklaroi se qeveria po përpiqet të gjejë një zgjidhje që do të mundësojë vazhdimin e furnizimit me energji dhe mbrojtjen e konsumatorëve nga pasojat e sanksioneve.
Presidenti serb tha se, pavarësisht ndërprerjes së operacioneve në rafinerinë e NIS-it në Pançevë, Serbia ka arritur të sigurojë rezerva të mjaftueshme për momentin.
Megjithatë, Vuçiq paralajmëroi se situata mund të bëhet më e pasigurt nëse çështja e pronësisë së NIS-it nuk zgjidhet në përputhje me kërkesat që lidhen me sanksionet ndërkombëtare.
Ai theksoi se qeveria serbe nuk planifikon një nacionalizim të menjëhershëm të kompanisë, por pret që struktura e pronësisë të ndryshojë në mënyrë që të përmbushen kërkesat ndërkombëtare.
Sipas Vuçiqit, një zgjidhje e shpejtë është e rëndësishme edhe për ekonominë serbe. Ai paralajmëroi se një përshkallëzim i krizës energjetike mund të ndikojë në rritjen ekonomike, pagat dhe pensionet.
Pavarësisht pasigurive, Vuçiq u shpreh optimist se Serbia do të arrijë të sigurojë furnizimin me gaz dhe karburante, duke synuar që qytetarët të mos përballen me mungesa dhe pasoja të drejtpërdrejta nga sanksionet.