Tirana bllokon disa rrugë të dielën për Tiranathlon 2026, ja segmentet ku ndalohet qarkullimi
Tirana do të presë të dielën, më 27 shtator, edicionin e radhës të “Tiranathlon 2026”, aktiviteti sportiv që bashkon në një garë tre disiplina: notin, çiklizmin dhe vrapin.
Për zhvillimin normal të aktivitetit, Bashkia e Tiranës, në bashkëpunim me Policinë e Shtetit, ka përcaktuar një plan të posaçëm për kufizimin dhe devijimin e qarkullimit të automjeteve.
Bllokimet do të jenë në fuqi nga ora 08:00 deri në 13:00, në disa segmente rrugore:
- Rruga “Dajtit”, nga kryqëzimi me rrugën “Xhelal Molla” deri te kryqëzimi me rrugën e “Vrapëve”, përfshirë edhe rrugën “Dëshmorët e Helikopterëve”.
- Bulevardi “Zhan D’Ark” dhe Bulevardi “Bajram Curri”, në segmentin nga ura e Shkozës deri te kryqëzimi me rrugët “Selman Riza” dhe “Kastriot Feska”.
- Rruga interurbane kryesore TEG–Ura e Shkozës.
- Segmenti i Unazës së Madhe, nga nyja e Rrethrrotullimit të Freskut deri në TEG. Automjetet do të devijohen drejt Rrethrrotullimit të Freskut, me dalje në rrugën “Xhanfize Keko”.
Ndryshime do të ketë edhe në qarkullimin e transportit publik. Linja 10/A “Materniteti i Ri – Qendër – Ish-Fusha e Aviacionit” do të devijohet përkohësisht te ura e Brrylit, ndërsa linja 10/C “Rrethrrotullimi Shkozë – Ish-Fusha e Aviacionit” do të pezullohet përkohësisht.
Ndërkohë, mjetet e emergjencës dhe ato të Policisë së Shtetit do të vijojnë të qarkullojnë normalisht në të gjitha segmentet e përfshira në planin e masave.
Bashkia e Tiranës dhe strukturat e Policisë Rrugore do të angazhohen për zbatimin e masave dhe menaxhimin e trafikut gjatë zhvillimit të aktivitetit.