Presidenti i Shteteve të Bashkuara, Donald Trump, ka nënshkruar ligjin që i hap rrugë vendosjes së sanksioneve të gjera ndaj Rusisë, në kuadër të përpjekjeve për të shtuar presionin ekonomik mbi Moskën dhe për ta nxitur drejt përfundimit të luftës në Ukrainë.
Legjislacioni, i njohur si “Lindsey O. Graham Sanctioning Russia and Iran Act”, u miratua nga Dhoma e Përfaqësuesve me 262 vota pro dhe 159 kundër, vetëm dy ditë përpara se të nënshkruhej nga presidenti amerikan.
Në qendër të masave janë të ardhurat e Rusisë nga eksportet e naftës dhe gazit. Sanksionet mund të prekin gjithashtu shtetet që vazhdojnë të blejnë energji ruse, ndërsa parashikohen masa edhe ndaj zyrtarëve politikë e ushtarakë rusë.
Ligji synon gjithashtu individë, kompani dhe rrjete jashtë Rusisë që, sipas autoriteteve amerikane, ndihmojnë Moskën në furnizimin e sektorit të saj ushtarak ose në shmangien e sanksioneve ndërkombëtare.
Në fokus janë edhe të ashtuquajturat “anije fantazmë”, të përdorura për transportin e naftës ruse dhe për anashkalimin e kufizimeve të vendosura ndaj eksporteve energjetike të Moskës.
Legjislacioni i jep presidentit amerikan kompetenca të gjera për zbatimin e masave ndëshkuese. Ndër të tjera, ai mund të vendosë tarifa ndaj vendeve që blejnë energji nga Rusia ose që ndihmojnë në shmangien e sanksioneve.
Tarifat e parashikuara mund të arrijnë deri në 100 për qind, duke përbërë një nga instrumentet kryesore për rritjen e presionit ekonomik ndaj Rusisë dhe partnerëve të saj tregtarë.
Megjithatë, disa demokratë kanë shprehur kundërshtime, veçanërisht ndaj kompetencave të gjera që ligji i jep presidentit për vendosjen e tarifave ndaj vendeve të treta.
Mbështetësit e legjislacionit argumentojnë se masat synojnë të kufizojnë burimet financiare që Rusia përdor për luftën në Ukrainë. Ndërsa kritikët kanë ngritur shqetësime për hapësirën e madhe që i lihet presidentit në përcaktimin dhe zbatimin e tarifave ndaj shteteve të tjera.