Ndryshon moti të premten, rikthehen reshjet dhe bien ndjeshëm temperaturat
Pas disa ditësh me mot të qëndrueshëm dhe temperatura relativisht të larta, e premtja, 25 shtator, pritet të sjellë një ndryshim të dukshëm të kushteve atmosferike.
E enjtja parashikohet kryesisht e kthjellët, me temperatura që në disa zona mund të arrijnë deri në rreth 28°C. Por situata pritet të ndryshojë gjatë së premtes, kur shtimi i vranësirave dhe rikthimi i reshjeve do të shoqërohen me një ulje të temperaturave.
Në Tiranë, parashikimet tregojnë për reshje shiu, veçanërisht gjatë pjesës së parë të ditës. Temperatura maksimale pritet të zbresë në rreth 20°C, nga rreth 26°C që parashikohen një ditë më parë.
Disa modele meteorologjike parashikojnë mundësi të lartë për reshje, ndërsa nuk përjashtohen edhe episode me shtrëngata në zona të caktuara.
Ndryshimi më i dukshëm pritet të jetë rënia e temperaturave, duke sjellë një mot më të freskët dhe tipik për periudhën e vjeshtës.
Sipas parashikimeve aktuale, kjo situatë pritet të jetë e përkohshme. Gjatë fundjavës, temperaturat mund të rriten gradualisht dhe periudhat me diell të bëhen më të shpeshta.
Megjithatë, parashikimi mbetet i ndryshueshëm dhe mund të përditësohet në orët në vijim, veçanërisht sa i përket intensitetit dhe shpërndarjes së reshjeve.
