Gjermania pritet të lehtësojë procedurat për njohjen e diplomave të profesionistëve të huaj të shëndetësisë, me ndryshimet e reja që hyjnë në fuqi më 1 nëntor.
Reforma synon të shkurtojë kohën e pritjes për vlerësimin e kualifikimeve dhe të reduktojë burokracinë për personat që kanë përfunduar studimet jashtë Bashkimit Evropian dhe dëshirojnë të punojnë në Gjermani.
Ndryshimet prekin disa kategori profesionistësh, përfshirë mjekët, dentistët, farmacistët dhe mamitë. Me rregullat e reja, procesi i vlerësimit të diplomave do të zhvillohet sipas procedurave të përcaktuara nga reforma.
Kjo nismë vjen në kuadër të përpjekjeve për të lehtësuar integrimin e profesionistëve të huaj në tregun gjerman të punës dhe për të përshpejtuar plotësimin e nevojave për personel të kualifikuar në sektorin e shëndetësisë.
Megjithatë, lehtësimi i procedurave nuk nënkupton njohje automatike të diplomave, pasi aplikantët duhet të plotësojnë kushtet dhe kërkesat përkatëse për ushtrimin e profesionit.
