E bujshme! Atentat ndaj ish-kryeministrit Farooq Abdullah në mes të dasmës: “E prisja këtë moment prej 20 vitesh”
Ish-kryeministri i rajonit indian Jammu dhe Kashmir, Farooq Abdullah, i shpëtoi për mrekulli një atentati gjatë një ceremonie martesore në qytetin e Jammu.
Ngjarja ndodhi në prani të shumë të ftuarve, kur një person iu afrua shumë pranë dhe tentoi ta qëllonte me armë zjarri. Fatmirësisht plumbi nuk e goditi objektivin, ndërsa ndërhyrja e menjëhershme e forcave të sigurisë bëri të mundur neutralizimin e autorit dhe shmangien e një tragjedie.
Sulmuesi, 63-vjeçari Kamal Singh Jamwal, u arrestua në vendngjarje nga komandot e National Security Guard, të cilët ishin përgjegjës për sigurinë e ish-kryeministrit.
Sipas policisë, i dyshuari nuk shfaqi asnjë pendesë. Ai deklaroi se kishte pritur 20 vite për këtë moment dhe se sulmi lidhej me një “agjendë personale”.
Kur u pyet për motivin, ai u shpreh: “Sot pata mundësinë ta vrisja, por nuk u vra, ai mbijetoi.” Në një tjetër moment shtoi: “Kisha misionin tim.”
Pas tentativës së dështuar, i dyshuari u godit nga disa persona të pranishëm në dasmë përpara se të merrej në kontroll nga policia dhe të dërgohej në paraburgim. Autoritetet kanë nisur hetimet për të zbardhur plotësisht motivet e sulmit.