Afro 20 miliardë lekë, ose rreth 220 milionë euro, parashikohet të shpërndahen për pensionistët në Shqipëri përmes bonusit mujor, duke nisur nga janari i vitit 2027. Sipas skemës së re, përfitimi financiar do të jetë dy herë më i lartë krahasuar me shumën që pensionistët marrin gjatë vitit 2026.
Bonusi do të ndryshojë në varësi të kategorisë së pensionit dhe nivelit të të ardhurave mujore. Konkretisht, përfitimet do të ndahen si më poshtë:
* 3,600 lekë në muaj do të përfitojnë pensionistët me pension të plotë urban, kur masa e pensionit nuk kalon 40 mijë lekë në muaj.
* 2,000 lekë në muaj do të marrin pensionistët e fshatit, me pension deri në 18 mijë lekë.
* 1,600 lekë në muaj do të përfitojnë pensionistët me pension të pjesshëm urban, kur shuma mujore nuk kalon 22 mijë lekë.
* 1,400 lekë në muaj do të përfitojnë qytetarët me pension familjar, me të ardhura deri në 18 mijë lekë në muaj.
* 1,200 lekë në muaj do të marrin pensionistët e invaliditetit, pensioni i të cilëve nuk është më i lartë se 30 mijë lekë.
Pensionistët që kanë të ardhura mbi kufijtë e përcaktuar për secilën kategori nuk do të përfitojnë nga kjo skemë bonusi.
Përveç rritjes së bonusit mujor, qeveria ka parashikuar edhe një fond prej 4 miliardë lekësh për indeksimin e pensioneve. Ky proces pritet të nisë në muajin prill, tre muaj më herët nga afati që ishte parashikuar fillimisht.
Masat e reja synojnë të rrisin të ardhurat mujore të pensionistëve dhe të ofrojnë më shumë mbështetje financiare për kategoritë e ndryshme, në kushtet e rritjes së kostos së jetesës.
Sipas planit të prezantuar, ndryshimet do të hyjnë në fuqi nga janari 2027, ndërsa përfitimi do të përcaktohet në bazë të kategorisë dhe kufirit të pensionit të secilit qytetar.