Panik në Rinas: Person i armatosur me hanxhar terrorizon kalimtarët, neutralizohet në kohë
Një situatë e rrezikshme është regjistruar pak minuta më parë në rrugën e Rinasit, rreth 300 metra pranë mbikalimit, ku një person ka shkaktuar panik mes qytetarëve.
Sipas dëshmive nga vendngjarja, autori fillimisht ka përplasur katër automjete dhe më pas ka dalë nga makina duke kërcënuar dhe ndjekur kalimtarët me një hanxhar në dorë.
Në momentin e incidentit, në zonë ndodheshin rastësisht tre efektivë të Forcave të Armatosura, të dyshuar si pjesë e strukturave speciale të Marinës, të cilët kanë reaguar menjëherë.
Ata kanë ndërhyrë me shpejtësi, kanë neutralizuar personin, i kanë marrë armën e ftohtë dhe e kanë mbajtur nën kontroll deri në mbërritjen e Policisë së Shtetit.
Më pas, policia ka bërë shoqërimin e tij në komisariat për veprime të mëtejshme procedurale.
Falë reagimit të shpejtë të efektivëve, është shmangur një ngjarje më e rëndë, ndërsa fatmirësisht nuk raportohen persona të lënduar.