Kreu i opozitës, Sali Berisha, vetëm pesë muaj pasi shpalli Florian Binaj si kandidat të mbështetur nga opozita për zgjedhjet lokale në Tiranë, duket se ka ndryshuar qëndrim.
Më 6 tetor të vitit të kaluar, kur fillimisht u caktua data 9 nëntor për zgjedhjet në Tiranë – të cilat më pas u rrëzuan nga Gjykata Kushtetuese – Berisha shprehej i bindur se Binaj do të fitonte përballë Ogerta Manastirliu.
Por këtë të shtunë, gjatë një konference për shtyp, Berisha deklaroi se kandidatura për Tiranën do të vendoset nga opozita dhe jo nga figura të pavarura.
Ai theksoi se puna për përzgjedhjen e kandidatëve ka nisur dhe se emrat do të bëhen publikë shumë kohë përpara zgjedhjeve lokale të vitit 2027.
“Opozita ka filluar punën dhe së shpejti do të përfundojë procesin e analizës dhe përzgjedhjes brenda partisë. Paralelisht, po punohet edhe për zgjedhjet lokale. Kandidatët nuk do të prezantohen vetëm dy muaj përpara, por shumë më herët se në zgjedhjet e fundit,” u shpreh Berisha.
Ndërkohë, Partia Socialiste ka përmendur emrin e Ogerta Manastirliut si kandidate për Bashkinë e Tiranës. Nga ana tjetër, dëshirën për kandidim e ka shprehur edhe Erion Braçe, për të cilin Berisha u shpreh me kritika.
Ai e cilësoi Braçen si “përfaqësues të një partie që është zhdukur pa nam e nishan”, duke shtuar se opozita do t’u ofrojë qytetarëve të Tiranës kandidaturën më të mirë të mundshme.
“Partia Demokratike do të bëjë gjithçka për të ndërtuar një front sa më të gjerë opozitar dhe për të sjellë kandidaturën më të shkëlqyer për Tiranën,” përfundoi ai.