Procesi për zgjedhjen e presidentit në Kosovë vijon të mbetet i bllokuar, ndërsa Lëvizja Vetëvendosje dhe lideri i saj, Albin Kurti, nuk kanë ndërmarrë ende hapa konkretë, pavarësisht se afati kushtetues po afron drejt fundit. Me më pak se tre javë në dispozicion, rreziku për zgjedhje të reja mbetet i pranishëm.
Edhe pse nga partia në pushtet është paralajmëruar një intensifikim i përpjekjeve, Kurti ka udhëtuar drejt Londrës, ku pritet të marrë pjesë në një diskutim mbi “shtetformimin ekonomik dhe stabilitetin global”, organizuar nga ODI Global.
Nga ana tjetër, zyrtarë të Vetëvendosjes kanë përsëritur se do të shtojnë përpjekjet për të gjetur një zgjidhje brenda afatit. Arbërie Nagavci theksoi se vendi ka nevojë për një president të zgjedhur në Kuvend dhe se zgjedhjet e reja nuk janë zgjidhje e dëshirueshme.
Një apel për kompromis ka ardhur edhe nga kryetarja e Kuvendit, Albulena Haxhiu, e cila ka kërkuar bashkëpunim mes partive për të shmangur skenarin e zgjedhjeve të parakohshme.
Ndërkohë, opozita ia faturon përgjegjësinë kryesore shumicës parlamentare. Vlora Çitaku nga Partia Demokratike e Kosovës ka kërkuar më shumë seriozitet dhe hapa konkretë nga qeveria, duke theksuar se deri më tani nuk ka pasur asnjë kërkesë zyrtare për bashkëpunim.
Të njëjtin qëndrim ka shprehur edhe Jehona Lushaku-Sadriu nga Lidhja Demokratike e Kosovës, e cila ka paralajmëruar për rrezikun real të shkuarjes në zgjedhje nëse nuk arrihet një marrëveshje.
Në përpjekje për zgjidhje, Kurti ka zhvilluar një takim me kreun e LDK-së, Lumir Abdixhiku, por pa rezultat konkret. Ndërkohë, një takim i paralajmëruar me kreun e PDK-së, Bedri Hamza, ende nuk është realizuar, pasi ky i fundit ka kërkuar një ftesë zyrtare me shkrim.
Situata mbetet e paqartë, ndërsa koha për zgjidhjen e ngërçit po shkurtohet çdo ditë.