Tronditje në artin shqiptar! Ndahet nga jeta mjeshtri që la pas vepra të pavdekshme!

Është ndarë nga jeta në moshën 87-vjeçare piktori i njohur shqiptar Skënder Kamberi, një nga figurat më të spikatura të artit pamor në vend.

Me një karrierë të gjatë dhe të përkushtuar ndaj artit, Kamberi është vlerësuar si një nga “penelat” më të dalluara të pikturës shqiptare që prej fillimit të viteve ’60. Krijimtaria e tij ka lënë gjurmë të thella në historinë e artit, duke u dalluar për stilin dhe tematikat e fuqishme.

Një pjesë e rëndësishme e veprave të tij, kryesisht kompozime, ruhen sot në fondin e Galeria Kombëtare e Arteve në Tiranë, si dhe në koleksione private brenda dhe jashtë vendit. Veprat e tij kanë kapërcyer kufijtë, duke u ekspozuar në vende si Egjipti, Franca, Anglia, Turqia, Italia dhe Greqia.

Ndër krijimet më të njohura të tij përmenden tablotë kompozicionale “Ndihma e shokut” (1966), “Betimi i Vrana Kontit” (1968), “Kthimi i nëndetëseve”, “Buka e duarve tona” (1976), “Në Belvedere në Vjenë sikur pashë Skënderbenë” (1977), “Otranto, 1997”, si dhe portretet e luftëtarit Sali Vranishti (1971) dhe të poetes Maro Pasho (1973).

Skënder Kamberi lindi në Vlorë më 2 shkurt 1939. Ai përfundoi Liceun Artistik në vitin 1960 dhe më pas vijoi studimet në Institutin e Lartë të Arteve, ku u diplomua në vitin 1965, duke nisur kështu një rrugëtim të gjatë e të suksesshëm në artin shqiptar.