NAIM MURSELI KËRKON FALJE NDAJ PACOLLIT NË GJYKATË
Naim Murseli ka kërkuar publikisht falje ndaj Behgjet Pacolli gjatë seancës gjyqësore, pasi emri i këtij të fundit është përmendur disa herë në këtë proces.
Në deklaratën e tij para trupit gjykues, Murseli theksoi se përmendja e Pacollit ka qenë e padrejtë dhe pa lidhje me çështjen në fjalë.
“Në këtë proces gjyqësor, në mënyrë të padrejtë është përmendur disa herë edhe Behgjet Pacolli, i cili nuk ka asnjë lidhje me këtë rast. Ndjej keqardhje sa herë që është përmendur emri i tij”, u shpreh ai.
Murseli u bëri gjithashtu thirrje autoriteteve që të marrin një vendim sa më shpejt për këtë çështje, duke përmendur edhe provat që, sipas tij, janë paraqitur nga mbrojtja.
Ai theksoi se është propozuar edhe një CD si provë, ku sipas tij shfaqet duke vrapuar me fëmijët, për të mbështetur deklarimet e tij.
Në fund, ai sqaroi se mungesa e komunikimit me fëmijët nuk lidhet me dëshirën e tyre, por me faktin që ndodhet në paraburgim.