Finalisti i Big Brother VIP 5, Miri, ka dhënë reagimin e tij të parë pas daljes nga shtëpia më e ndjekur në Shqipëri, në një intervistë për Top Channel.
Ai u shpreh se nuk ndihet aspak i zhgënjyer nga rrugëtimi i tij në këtë edicion, duke theksuar se eksperienca ka qenë e veçantë dhe ndryshe nga çdo kompeticion tjetër ku ka marrë pjesë më parë.
Duke folur për fituesen, Selin Bollati, Miri tha se është i lumtur për fitoren e saj, madje kujtoi edhe një deklaratë të bërë që në ditët e para të qëndrimit në shtëpi. Sipas tij, nëse Selina do të fitonte, kjo do të ishte një fitore edhe për të.
Ai shtoi se nuk pendohet për asgjë nga loja e tij dhe se ka arritur të tregojë veten ashtu siç është në realitet – një person me zemër të madhe, edhe pse kjo mund të jetë perceptuar si dobësi nga disa.
Miri theksoi gjithashtu se pjesëmarrja në BBVIP i ka dhënë diçka që i kishte munguar prej vitesh: një lidhje më të afërt me publikun, duke bërë që njerëzit ta njohin më mirë përtej skenës dhe muzikës.
Eksperienca 120-ditore, sipas tij, ishte e gjatë dhe sfiduese, por në fund rezultoi një nga përvojat më të rëndësishme në jetën e tij.