Një operacion i gjerë antidrogë është duke u zhvilluar në Tirana, ku me urdhër të prokurorisë janë lëshuar 30 urdhërarreste.
Sipas burimeve, aksioni synon goditjen e disa grupeve kriminale të përfshira prej kohësh në shitjen dhe shpërndarjen e lëndëve narkotike në zona të ndryshme të kryeqytetit.
Hetimet për këtë çështje kanë nisur prej disa muajsh nga strukturat e Antidrogës në Tiranë. Mësohet se operacioni është ndërtuar mbi prova të siguruara nga aksione të mëparshme, si dhe nga zbërthimi i komunikimeve mes personave të dyshuar.
Gjatë hetimeve janë përdorur edhe metoda proaktive, përfshirë blerje të simuluara, me qëllim dokumentimin e plotë të aktivitetit kriminal.
Deri në këto momente nuk është bërë ende publik numri i personave të arrestuar, ndërsa autoritetet nuk kanë dhënë detaje as për sasinë e lëndëve narkotike të sekuestruara gjatë operacionit.
