Një krim i rëndë ka tronditur pasditen e sotme zonën e Kalamatës. Një shtetas shqiptar është gjetur i pajetë në vendin e njohur si Burnia, ndërsa identiteti i tij ende nuk është bërë publik nga autoritetet.
Sipas të dhënave paraprake, viktima punonte në një stallë lopësh në këtë zonë rurale. Dyshohet se ai është qëlluar për vdekje me armë gjahu nga një distancë shumë e afërt, duke mos pasur asnjë mundësi shpëtimi për shkak të plagëve fatale.
Pas zbulimit të trupit, policia mbërriti menjëherë në vendngjarje dhe nisi hetimet për zbardhjen e plotë të rrethanave.
Si autor i dyshuar i krimit është shpallur pronari grek i stallës ku punonte viktima. Forcat e rendit ushtruan kontroll në banesën e tij, por ai nuk u gjet, duke u shpallur në kërkim.
Ndërkohë, motivet e kësaj ngjarjeje të rëndë mbeten ende të paqarta. Hetuesit po punojnë për të zbuluar nëse bëhet fjalë për një konflikt të momentit apo për një përplasje të mëhershme mes tyre.