Avokati i ish-Presidentit Ilir Meta, Kujtim Cakrani, ka folur në një lidhje “Breaking” në Top News, ku u shpreh se Meta duhet të lirohet nga paraburgimi.
Sipas tij, dita e sotme përbën një fitore për avokatët, pasi janë vendosur standarde të reja lidhur me masat e paraburgimit. Cakrani theksoi se vendimi i gjykatës, i cili i jep të drejtë personit nën hetim, është ankimuar nga prokurori i çështjes.
Ai shtoi se Meta nuk duhej të ishte arrestuar dhe se, sipas vendimit të sotëm, ai duhet të jetë i lirë që nesër. “Gjykata e ka thënë qartë: Gjykata e Posaçme duhet ta lirojë Metën nga paraburgimi. Tani i takon prokurorit të argumentojë pse Meta përbën rrezikshmëri,” u shpreh avokati.
Cakrani ngriti gjithashtu pyetjen nëse ekzistojnë dëshmitarë kundër Metës, duke shtuar se me këtë praktikë të re, shumë qytetarë shqiptarë mbahen në paraburgim pa një arsyetim të fortë ligjor.
Ai theksoi se gjykatat duhet të vlerësojnë çdo rast duke analizuar nëse masat alternative janë të përshtatshme dhe nëse personi paraqet rrezikshmëri shoqërore. “Nëse ka rrezikshmëri, atëherë paraburgimi justifikohet, por sot u rrëzua një alibi e ndërtuar më parë. Ishte një vendim i vonuar, por i drejtë. Sot avokatët fituan një betejë,” përfundoi Cakrani.