Mungesa e fuqisë punëtore po vazhdon të shqetësojë bizneset turistike në jug të Shqipërisë edhe këtë sezon veror. Hotele, bare dhe restorante në zona si Ksamili, Saranda dhe Dhërmiu po ofrojnë paga gjithnjë e më të larta për të siguruar staf sezonal.
Sipas agjencive të punësimit, kërkesa më e madhe mbetet për sanitare, pjatalarëse dhe staf shërbimi, ku pagat arrijnë deri në 1,200 euro në muaj. Përveç pagesës, shumë biznese po ofrojnë edhe akomodim dhe ushqim falas për punonjësit.
Në zonat turistike të jugut, pagat për sanitaret variojnë nga 100 mijë deri në 120 mijë lekë në muaj, ndërsa pjatalarëset mund të paguhen deri në 120 mijë lekë. Edhe në zonën e Shkëmbit të Kavajës kërkohen punonjës për shërbimet në plazh me paga deri në 80 mijë lekë.
Agjencitë e ndërmjetësimit raportojnë se ofertat e bizneseve këtë vit janë rreth 20% më të larta krahasuar me sezonin e kaluar, për shkak të mungesës së punëtorëve dhe kërkesës së lartë nga sektori i turizmit.
Sipas përfaqësuesve të tregut të punës, shumë gra që më parë emigronin për punë jashtë vendit po zgjedhin tashmë të punojnë sezonalisht në Shqipëri, pasi pagat janë bërë më konkurruese dhe kushtet më të favorshme.
Ndërkohë, bizneset po preferojnë kryesisht punonjës vendas, megjithëse një pjesë e kërkesës po mbulohet edhe nga të huajt.
Pozicionet më të kërkuara dhe pagat mesatare: • Kamarier: 80,000 – 120,000 lekë/muaj
• Sanitare: 80,000 – 100,000 lekë/muaj
• Kamarier bari: 60,000 – 70,000 lekë/muaj
• Menaxher hoteli: 150,000 – 200,000 lekë/muaj